Хар ирвэс - Патрик Стефан Клюйверт

Саяхандаа, тун саяхан улбар шаруудын салшгүй нэгэн хэсэг болж, дотогт Пелегийн нэрлэсэн өнөө цагийн хамгийн аугаа 100 хөлбөмбөгчний тоонд орж байсан ногоон талбайн нэгэн тод од бол Хар ирвэс хочит Патрик Клюйверт билээ.

1976 оны долдугаар сарын 1. Энэ өдөр Голландын хөлбөмбөгт ирээдүйн гайхамшигт хоёр тоглогч Гоалын машин Рууд Ван Нистелрой, хар ирвэс Патрик Стефан Клюйверт нар хорвоод мэндэлжээ. Улбар шаруудын бүрэлдэхүүнд өмнөд Америк дахь Голландын колони байсан Суринам гаралт тамирчид цөөнгүй тохиолддог. Тэдгээрийн нэг нь бидний сайн мэдэх хар ирвэс билээ.

Патрикийн эцэг нь Суринамд төрсөн мэргэжлийн хөлбөмбөгчин байсан бол эх нь Антилын арлуудын нэг болох Куразиогоос гаралтай нэгэн байв. Бяцхан Патрик гудамжинд бөмбөг өшиглөж, хөлбөмбөгтэй анх танилцсан гэдэг. Шеллинвоуд хэмээх жижигхэн клубт нэг жил тоглоёны дараа дөнгөж долоохон настай байхдаа Аяаксын хүүхдийн академид оржээ. Тэрээр хүүхэд ахуйдаа төвийн хамгаалагчаас эхлэн ногоон талбайн бүхий л байралд тоглосон юм. Үеийн үед авъяас билэгтнүүдийг тасралтгүй төрүүлж байдаг Аяаксын академи түүнд хүчирхэг бие бялдар, ухаалаг байдал, өндөр техник болон гайхалтай хурдыг бий болгож өгсөн байна. Гэхдээ түүний төрөлхийн хурц, түргэн ааш нь өөрчлөгдөөгүй юм.

Клюйверт Аяаксын академид байхдаа 15, 16, 17 хүртлэх насны шигшээ багийнхаа бүрэлдэхүүнд багтан тоглодог байв.

1990-ээд он. Энэ бол Аяаксын алтан эрин. Эдвин Ван Дер Сар, Эдгар Давидс, Денис Бергкамп, Кларенс Зеедорф, Франк де Бур, Патрик Клюйверт тэргүүтэй өөрийн академийн авъяаслаг бүтээгдэхүүнүүдээр багийн ноён нуруугаа босгосон баг 1994-1995 оны улирлын Аваргуудын лигийн аварга болов. Финалын тоглолтын 85 дахь минутад сэлгээрээр талбайд гарсан Клюйверт АС Миланы хаалгыг мялааж, түүхэн ялалтыг багтаа бэлэглэсэн билээ. Энэ үйл явдлаас хойш Аяаксын алтан жаалууд Европын акулуудын хараанд өртөж, хилийн дээс алхах болов. 1997 онд АС Милан клуб Босманы худалдааны дүрмийг ашиглан Патрикийг өөрийн бүрэлдэхүүнд оруулсан байна. Аяаксын бүрэлдэхүүнд 100 тоглолт хийж, 52 гоал оруулаад байлаа.

Италид хийсэн анхны тоглолтдоо л гайхалтай гоал оруулав. Гэвч түүнд гай тохиож автомашины осол хийн хүний амь насыг хохироосон байна. Үүнээс болж дөнгөж 27 тоглолтод оролцож, 6 гоал оруулсан билээ.

Аппеннины хойгт амжилтгүй нэг улирлыг үдсний дараа нарлаг Пиренейд Каталаны нэр төр Барселоны төлөө хүчин зүтгэхээр болов. Тэнд өмнө нь Аяакст түүний дасгалжуулагчаар ажиллаж байсан Луй Ван Гааль ирээд байсан юм. 1998 оноос 2004 оны зун хүртэл 6 улирал 257 тоглолтод оролцож, 122 гоал оруулсан билээ.

2004 онд Барса түүнийг чөлөөт агент болгож, хар ирвэс маань Ньюкасл, Валенси, ПСВ, Лилль клубуудэд тоглож байгаад одоо чөлөөт агент болсон билээ.

Клюйверт Голландын хөлбөмбөгийн холбооны дасгалжуулагчийн сургалтад хамрагдан мэргэжлийн хөлбөмбөгийн дасгалжуулагчийн эрх аваад байна. Өнөөдөр тэрээр Эрэдивизийн АЗ Алкмаар клубын сайн дурын туслах дасгалжуулагчаар ажиллаж байна. Түүний журмын анд Денис Бергкамп Аяакс клубт түүнтэй ижил алба хашиж байгаа юм.

Евро 96-ийн ихэнх тоглолтод оролцож чадаагүй боловч хэсгийнхээ сүүлийн тоглолтод Английн хаалганд Бергкампын дамжуулалтаар гоалдсан нь одоо ч дурсагдсаар байдаг. Харамсалтай нь хасагдах шатанд Францад тогуулийн цохилтоор хожигдсон билээ. Евро 2000 бол түүний хамгийн амжилттай тоглосон тэмцээн болсон бөгөөд Саво Милошевичийн хамтаар тус тэмцээний мэргэн бууч болсон билээ. Франц 98-д оролцохдоо Пьер Луйжи Коллинагаас улаан карт хүртэн талбайг чөлөөлж байв. Дик Адвокаат Евро 2004 тэмцээнд Клюйвэртэд 9 дугаартай тоглохыг зөвшөөрсөн ч талбайд гаргаагүй юм.

Марко Ван Бастен улбар шаруудыг дасгалжуулах болсноор хар ирвэс дахин томоохон тэмцээнд дуудагдаагүй билээ. Тэрээр Голландын үндэсний шигшээ багийн бүх цаг үеийн мэргэн бууч бөгөөд улбар шаруудын төлөө 40 гоал оруулаад байна.

Тэрээр харьцангуй хурдан бөхсөн од гэгддэг. Тэр одоо дөнгөж 32 настай.

Гавъяа шагнал

• Аяакст
  • Голландын супер цомын эзэн 1994, 1995
  • Эрэдивизийн аварга 1995, 1996
  • УЕФА Аваргуудын лигийн аварга 1995
  • Европын супер цом 1995
  • Интерконтиненталь цомын аварга 1995
• Барселонд
  • Ла лигийн аварга 1999
• ПСВ-д
  • Эрэдивизийн аварга 2007

Голландын үндэсний шигшээ багт

• Euro 2000 – мэргэн бууч
• Бүх цаг үеийн мэргэн бууч (2004 оны тавдугаар сарын 1-нд тогтоосон.)