Хүрсэн бүхнээ алт болгон хувиргагч Carlos Slim Hel

Эртний Грекийн домогт гардаг хүрсэн бүхнээ алт болгон хувиргадаг Мидас хаан шиг хэмээн Латин Америк даяар алдаршсан дэлхийн тэргүүн баян Carlos Slim Hel нь 1940 оны 1 дүгээр сарын 28 нд Мексик улсын нийслэл Мексик хотод Леваны цагаачийн гэр бүлд мэндэлжээ. Тэрээр 2007 оны 7 дугаар сараас албан ёсоор дэлхийн хамгийн баян хүнд тооцогдох болсон. Түүний бизнесийн гол чиглэл холбоо, харилцаа бөгөөд тэрээр Мексик, Латин америкийн харилцаа холбооны зах зээлд тэргүүлэх байр суурь бүхий "Telйfonos de Mйxico (Telmex)", "Telcel" and "Amйrica Mуvil" зэрэг компаниудыг эзэмшдэг байна.

Эдгээрээс гадна жижиглэн худалдаа, банк санхүү, компьютер, автомашины сэлбэг, эд анги зэрэг маш олон бизнесийн салбарт их, бага хэмжээгээр хувь эзэмшдэг. Түүний хөрөнгө 2005 оноос 2007 оны хооронд 18 тэрбумаар өсөж 67,9 тэрбум ам.долл-т хүрснээр 15 жилийн турш "дэлхийн хамгийн баян хүн" хэмээх тодотголтой явсан Microsoft компанийн үүсгэн байгуулагч Bill Gates-г гүйцжээ. Car¬los Slim Hel-н хөрөнгийн энэ хурдацтай өсөлтөд түүний эзэмшилд байдаг "Amйrica Mуvil"-ны хувьцааны үнийн өсөлт ихээхэн нөлөө үзүүлжээ.
Carlos Slim Hel-н эцэг Juliбn Slim нь Оттомоны хатуу ширүүн төрийн бодлогоос зугтааж Мексик улсад 1902 онд нүүн ирж суурьшжээ. Juliбn 1911 онд "La Estrella del Oriente" хэмээх өөрийн хувийн дэлгүүрээ нээн ажиллуулж эхэлсэн байна. Удалгүй чинээлэг Мексик худалдаачны охинтой гэрлэж 6 хүүхэдтэй болсны хамгийн бага нь Carlos Slim Hel юм. 1952 онд Juliбn Slim нас барсан ба Carlos Slim Hel өөрийн бизнесээ эхлүүлэхэд хангалттай хүрэлцэхүйц хөрөнгийг эцгээсээ өвлөн авчээ. Carlos Slim-н бизнесийн гараа анх 8 настайгаасаа эхлэн аавынхаа дэлгүүрийн өдөр тутмын үйл ажиллагаанд тусалдаг болсноор эхэлсэн гэхэд болох юм. 1961 онд тэрээр Мексикийн Үндэсний Автоматын Их сургуулийг инженер мэргэжилтэйгээр төгссөнийхөө дараа эцгээсээ өвлөн авсан хөрөнгөө ашиглан томоохон бизнест хөл тавьжээ. Тэрээр санхүүгийн салбарт нилээд ашигтай ажиллан удалгүй их дэлгүүр, ресторан, үл хөдлөх хөрөнгө, эмнэлэг, барилга, уурхай, тамхи, төмөр зам зэрэг маш олон чиглэлээр үйл ажиллагаа явуулдаг "Grupo Galas S.A"(хожим Grupo Carso болж өөрчлөгдсөн) группийн ихэнх хэсгийг эзэмшдэг болжээ. 1980 оны Латин Америкийн эдийн засгийн хямралын үеэр "Grupo Galas S.A" групп нь дампуурлын ирмэгт хүрсэн хэдий ч бизнесийн хувьд маш их нөөц бололцоотой 30 гаруй томоохон пүүс, компанийг өөрийн эгнээндээ элсүүлж чадсан байна. Энэ нь хожим Carlos Slim Hel-д сая саяар тоологдох ашиг орлогыг авчирчээ.
Carlos Slim Hel нь 1990 оны Мексикийн хувьчлалаар холбоо, харилцааны "Telйfonos de Mйxico (Telmex)" компанийг хувьчилж авснаар өөрийн бизнесээ шинэ шатанд гаргасан юм. Тэр үед 1,76 тэрбум ам.доллараар худалдан авч байсан уг компани нь өнөөдөр 40 тэрбум ам.долларын хөрөнгөтэй аварга том корпораци болжээ. Түүний энэхүү худалдан авалт ихээхэн хэл амд өртөж байсан байна. Энэ хувьчлалыг Мексикийн шинжээчид үзэхдээ Стратегийн ач холбогдолтой компанийг хувьд шилжүүлж байна гэж буруутгаснаас гадна маш хямд худалдсан гэсэн дүгнэлтийг өгсөн байна. Гэхдээ энэ дүгнэлт оргүй хоосон байгаагүй нь өнөөдөр харагдаж байна. Өнөөдрийн байдлаар Мексикийн холбоо, харилцааны зах зээлийн 90 хувийг "Telйfonos de Mйxico (Telmex)" дангаар эзэмшиж байгаа нь Мексикийн холбоо, харилцаа Carlos Slim-ээс бүрэн хараат байдалд байгаа гэхэд болно. Carlos Slim-ын дараагийн амжилттай худалдаа нь Apple корпорацийн 3 хувийн хувьцааг 1997 онд iMac-аа гаргахын өмнө нь худалдаж авсан явдал байв. Carlos Slim-г худалдан авч байх үед Apple-ын нэгж хувьцааны үнэ 17 ам.доллар байсан бол түүнээс жилийн дараа нэгж хувьцааны үнэ 100 ам.доллар болтол буюу анхны үнээсээ 6 дахин өсжээ. Өнөөдрийг хүртэл Apple-н хувьцааны үнэ хурдтайгаар өссөөр байгаа билээ. Мексикийн зах зээлийг эзэлснийхээ дараа тэрээр анхаарлаа хилийн чанд дахь улсууд руу хандуулж "CompUSA", "Amйrica Mуvil", "MCI" зэрэг компаниудын их хэмжээний хувьцааг худалдан авчээ. Түүний эзэнт гүрэн хүрээгээ улам хурдтайгаар тэлсээр байна. Түүний хөрөнгө 2003 онд 7,4 тэрбум ам.долл байсан бол 2007 онд 67,9 тэрбум ам.доллар болж өссөн. Ийм богино хугацаанд хөрөнгөө 60,5 тэрбумаар өсгөсөн хүн одоогоор түүнээс өөр байхгүй юм байна.

Мексик ба Carlos Slim

Мексик нь дэлхийн 12 дахь том эдийн засагтай, дэлхийн дунджаас дээгүүр орлоготой орнуудын тоонд багтдаг хэдий ч ядуурлын түвшин өндөр(нийт хүн амын 27.9%), баян хоосны ялгаа их, хүний хөгжлийн асуудал хурцаар тавигддаг орон юм. Тус орны ҮНБ нь 840 тэрбум ам.доллар байдаг байна. Өөрөөр хэлбэл Carlos Slim нь Мексикийн Үндэсний Нийт Бүтээгдэхүүний 8 хувьтай тэнцхүйц хөрөнгөтэй гэсэн үг юм. Харин түүний жилийн орлого Мексикийн улсын төсвийн 25 хувьтай тэнцэх ба үнэт цаасны зах зээлийн 40 хувийг Carlos Slim-н хувьцаа эзэлдэг байна. Мөн түүний "Telйfonos de Mйxico (Telmex) компани нь Мексикийн харилцаа, холбооны салбарын 90 хувийг өөрийн хяналтандаа байлгадаг байна. Carlos Slim нь Мексикийн хамгийн нөлөө бүхий компаниуд болох Comertel Argos, Red Uno, Uninet, Sanborns, Teleco, Amйrica Mуvil, SEARS, Telcel, Codetel, Bachoco, Cigatam, IMTSA - Impulsora Mexicana de Telecomunicaciones, Dorian's, Inbursa, Altria зэрэгт ерөнхийлөгчийн үүргийг гүйцэтгэдэг ба Herbalife, Televisa, Compusa, Soulkeeper-company, Volaris, Ix-informбtica, Mixup, Coca Cola компаниудын их хэмжээний хувьцааг эзэмшдэг байна. Энэ бүгдээс түүний Мексикт хир нөлөө бүхий хүн гэдгийг харж болох юм.
Түүний энэ Монополи байр суурь нь Мексикийн ард түмэнд тийм ч сайн нөлөө үзүүлдэггүй нь зарим олон улсын байгууллагаас хийсэн судалгаанаас харагддаг. Эдийн Засаг хамтын ажиллагаа, хөгжлийн байгууллагаас гаргасан судалгаагаар Мексик нь харилцаа, холбооны тал дээр дэлхийн хамгийн өндөр өртөгтэй 30 орны нэгээр шалгарсан байна. Мексикийн улс хооронд болон хот хоорондын телефон ярианы төлбөр, мөн интернэтийн төлбөр нь дэлхийн дундажтай харьцуулбал нилээд өндөр байдаг. Үүний гол шалтгаан нь Мексикийн хэрэглэгчдэд "Telйfonos de Mйxico (Telmex)-ээс өөр сонголт байхгүй, уг компани нь Монополи байр суурьтай байдагтай холбоотой юм байна. Carlos Slim нь нийгмийн сайн сайхны төлөөх үйлст хойрго ханддаг гэсэн шүүмжлэлд нилээд өртдөг байна. Тэр энэ талаар хэлэхдээ: "Бид Санта Клаус шиг зүгээр юм тараагаад байхаас илүү зүйлд анхаарлаа хандуулах хэрэгтэй. Ядуурал бол зөвхөн тусламж, хандиваар шийдчих асуудал биш юм" гэсэн байна. Эндээс түүнийг нийгмийн асуудалд ямар байр сууринаас ханддаг нь ойлгогдож байна.

Carlos Slim-н голлох бизнесүүд

Carlos Slim-н удирдан ажиллуулдаг 30 гаруй компанийн нэгдэл болох Carso Grupo (Carlos Slim нь өөрийн эхний гурван үсгээр, эхнэрийнхээ нэрийн эхний хоёр үсгийг нийлүүлэн нэрлэсэн)-ын хамгийн том төлөөлөгчид бол "Telйfonos de Mйxico (Telmex), Amйrica Mуvil, Grupo Sanborns компаниуд юм.

Telйfonos de Mйxico (Telmex)

Мексикийн телефон холбооны үйлчилгээ үзүүлэгч компани. Латин Америк, Аргентин, Вразил, Чили, Колумби, Перу, АНУ-д үйл ажиллагаа явуулдаг. Тус компани нь 1947 онд байгуулагдсан бөгөөд 1950 онд өөрийн цорын ганц өрсөлдөгч болох ITT Corporation-ыг худалдан авснаар Мексикийн цорын ганц телефон харилцааны нийлүүлэгч болсон. 1972 онд засгийн газрын мэдэлд очсон бөгөөд 1990 оны хувьчлалаар Carlos Slim 1.76 тэрбум ам.доллараар худалдан авчээ. Carlos Slim Telmex-г худалдан авах үед Tel¬mex нь суурин утасны зах зээлд Монополи байр суурьтай байсан хэдий ч цаашид өсөх ирээдүйтэй үүрэн телефоны зах зээлд Iusacell компани тэргүүлэгч байсан. Гэвч 1995 оны үндэсний валютын хямралаар Iusacell компани ихээхэн хэрэглэгчдээ алдсан бөгөөд үүнийг Telmex овжноор ашиглаж урьдчилсан төлбөрт үйлчилгээг шинээр нэвтрүүлж маш их амжилт олсон. 1997 он гэхэд тэд энэ салбарт тэргүүлэгч болж чадсан юм. Интернэтийн зах зээл дээр Telmex корпораци нь Uninet хэмээх брэндээр анх гарч ирсэн ба 1996 онд Carlos Slim Америкийн Prod¬igy Communications-ыг худалдан авч шинэ технологийг Мексикт нэвтрүүлснээр асар богино хугацаанд Мексикийн интернэтийн зах зээлийн өөрийн болгон авчээ. 2004 оноос Carlos Slim нь олон улсад бизнесээ өргөжүүлэхийн тулд Латин америкийн томоохон холбоо, харилцаа компаниудыг худалдан авч эхэлсэн юм. Тэрээр Бразилийн хамгийн том холын зайн оператор болох Embratel-г ,Чилийн Chilesat, Аргентины Techtel, АНУ-ын MCI зэргийг худалдан авчээ. Энэхүү өргөжүүлэлтээ одоо ч гэсэн хийсээр байна. 2006 оны 12 сараас Telmex нь Колумбийн томоохон компаниудтай хамтран ажиллаж 50 гаруй хотод өөрийн үйлчилгээгээ нэвтрүүлсэн. Мөн Telmex нь Португалийн Portugal Telecom компанийн 3.41% хувьцааг эзэмшдэг байна.

Amйrica Mуvil

Carlos Slim-ыг Дэлхийн хамгийн баян хүмүүсийн жагсаалтын 3-аас 1 хүртэл өсөхөд гол нөлөө үзүүлсэн компани нь бол энэхүү "Amйrica Mуvil" хэмээх утасгүй холболт(wireless)-ын үйлчилгээ үзүүлдэг компани юм. "Amйrica Mуvil" нь Латин Америкийн хамгийн том утасгүй холболтын үйлчилгээний компани ба дэлхийн хэмжээнд 5-т ордог байна. 2005, 2006 онуудад Business Week сэтгүүл "Amйrica Mуvil" компанийг мэдээлэл технологийн хамгийн шилдэг компаниар шалгаруулж байжээ. 2000 онд Carlos Slim нь "Amйrica Mуvil"-ыг Telmex-ээс тусгаарлан бие даасан компани болгон гаргаж байсан. Өнөөдрийн байдлаар тус компани нь 15 оронд 130 сая хэрэглэгчидтэй болсон байна.

Grupo Sanborns

Мексикийн хамгийн том жижиглэн худалдааны сүлжээ. 1903 онд тус компанийг Калифорнигийн 2 цагаач болох Walter, Frank Sanborn нар нээсэн боловч 1919 онд Мексикийн төрийн үймээн самуунаас залхсан Walter Sanborn ах Frank-даа компаниа үлдээгээд Америк руу буцсан байна. 1946 онд Frank Sanborn сүлжээ дэлгүүрээ Charles Walgreen хэмээх Чикаго хотын эм зүйчид худалджээ. 1985 онд Car¬los Slim уг жижиглэн худалдааны сүлжээ дэлгүүрийг худалдан авч 18,000 гаруй ажилтантай 125 салбар бүхий Мексикийн хамгийн том сүлжээ дэлгүүр болгожээ